දෙවන ලෝක යුද්දය හා ඉන් පසුව ලෝකයේ සිදුවූ කැපී පෙනෙන සිදුවීම් ගැන නොදන්නා අයට දැනගන්නටත්, ටිකක් දන්නා අයට එම දැනුම වැඩි කර ගැනීමටත්, ඉතිහාසය වෙනස් කරන්නට යන අයට අඩුම තරමෙන් මෙය කියවා වත් තමන් දරන මතය හා වපුරන විහිළු බොරු මතයන්ගෙන් ඈත් වීමටත් හොද පොතක් (International Politics) සහ සත් සමුදුරේ තවත් කඩඉමක් සමග පසුගියදා පල කල හිට්ලර් ගැන ලිපියේ ඇතැම් ඇනෝනිමසයන්ට පිළිතුරු..

මේ මාතෘකාවට සම්බන්ධ ලිපියක් සත් සමුදුරේ පසුගිය දිනක පල කර බව ඔබ දකින්නට ඇති. එය තමයි හිට්ලර් ගැන නොදත් කතා හා පින්තූර ලිපියත් සත් සමු‍දු‍රේ යම් සංධිස්ථානයක් කියලා කියන්නට පුළුවන්. හැබැයි එය නොවේ මේ මාතෘකාවේ කියන කඩඉම නම්. ඒ ලිපිය තමයි සත් සමුදුරේ මේ දක්වා අතිශයින්ම විවාද සම්පන්න වූ ලිපිය. තවමත් එයට විවිදාකාරවූ අදහස් ලැබෙනවා. හැබැයි මෙවැනි අදහස් නම් මෙම ලිපියට කෙසේවෙතත් ඊට පෙර ලියූ NATO සංවිධානයේ මූලික සංකල්පයෙන් බැහැරව ගොස් තවත් රටක් උලාකෑමේ අභිප්‍රාය සාක්‍ෂාත් කර ගැනීමේ අරමුණ සඵල කරගැනීමේ අභියස සිටියදී ලියමි... ලිපියට නම් විවිදාත්මක අදහස් බලාපොරොත්තුවුවද එයට එසේ නොවී අතිත සිදුවීම් අලලා ලියූ ලිපියකට දෙවන ලෝක යුද්ධයේ ප්‍රහාර මෙන් අදහස් ‍වැලනොකැඩී ගලා එන්නට විය. කෙසේවෙතත් කෙබදු අදහස් දැරූවද සියළුම දෙනාට ස්තූතිවන්ත වන්නේ අවකාශයේ තිබෙන අනිත් බ්ලොග් අඩවි හෝ වෙබ් අඩවි වල මෙන් නොවී මේ දක්වා අසැබි වදන් වලින් තොරව තමන්ගේ මතය ඉදිරිපත් කිරීම ගැනයි.

දැන් බලමු මාතෘකායවට අදාල වූ පොත මොකක්ද කියන එක ගැන. එය තමයි කොළඹ විශ්ව විද්‍යාලයේ හා ඉන් පෙර ටික කලක් පේරාදෙණිය විශ්වවිද්‍යාලයේ දේශපාලන අංශයේ සරසවි ඇදුරුතුමෙක් වූ මහාචාර්ය ඩබ්ලිව්. එම්. කරුණාදාස මහතා විසින් ලියන ලද ජාත්‍යන්තර දේශපාලනය (International Politics) කියන ග්‍රන්ථයේ 1 කොටස. කතෘ ප්‍රකාශනයක් වූ මෙය දෙහිවල ඉමේජ් ලංකා පබ්ලිෂර්ස් විසින් බෙදාහරිනු ලබන්නක්.

මෙම පොතේ මුලින් කියූ  හිට්ලර් ගැන නොදත් කතා හා පින්තූර ලිපිය හා සම්බන්ධ වුන හැමෝටම පරිශීලනය කරන්න ඉතා අනර්ඝ පොතක්. මොකද මෙය කියෙව්වා නම් "බටහිර මාධ්‍ය, බටහිර කුමන්ත්‍රණ" යනාදී "බටහිර" කියන වචනය අවශ්‍ය අනවශ්‍ය හැ‍ම මොහොතකම තොල් මතුරමින් සිටින සත්‍ය වසන්කරන්නටත්, ඉතිහාසය විකෘති කර එයට නිසි තර්කයකින් හා සාක්‍ෂි ඉදිරිපත් කිරීමකින් තොරව මත ඉදිරිපත් කරන්නට යන අයට අඩුම තරමෙන් ප්‍රවීණ ඇදුරුතුමෙක් ලියන ලද පොතක් හෝ කියවා තමන් යන මාවත ගැන සිතන්නට මෙය අවස්ථාවක් කරගනු ඇතැයි සිතමි. මෙහි කතුවරතුමා විසින් සටහන් කර ඇති අයුරින් මෙම පොතේ කිසිදු දෙයක් නිසි අවසරයකින් තොරව උපුටා ගත නොහැකි නිසා ඒවා මෙම ලිපියට ඇතුලත් කල නොහැකි වුවත් යම් දල අදහසක් පොත පිළිබදව ලබා දීමට කැමැත්තෙමි.

පසුගිය හිට්ලර් හා සම්බන්ධ ලිපියේදී හිට්ලර් හා ස්ටාලින් දෙවන ලෝක යුද්දයට පෙරාතුව ගිවිසුමකට එළඹුනේ ළදරු සෝවියට් ආණ්ඩුව රැක ගැනීමට බවට අදහසක් පල කර තිබුනි. එයට සත්‍ය හේතුව මෙම පොතේ මුල් පරිච්ඡේදය බැලීමෙන්ම ඔබට සොයාගත හැකිය.

‍එසේම යුද්දයට ඒ ඒ රටවල් සම්බන්ධ වූ හැටි ජර්මනියේ නැගීම හා බැසීම, අනෙකුත් රටවල් වලට යුද්ධය බලපෑ අන්දමද මෙහි සදහන්ය. යුද්දයෙන් පසු සිදු වූ දේවල් තුෂ්නි යුද්දය හෙවත් නිරවි යුද්දය පිළිබදව, ඉන් පසු බිහිවී අන්තර්ජාතික මට්ටමේ සංවිධාන පිළිබදව, ලෝකයේ ඒ ඒ කලාප වල ඇතිවූ අර්බුද, කොරියන් යුද්දය, කියුබානු මිසයිල ප්‍රශ්නය, වියට්නාම යුද්දය හා මැදපෙරදිග ඇතිවූ විවිද ගැටළු සහ තවත් බොහෝ කරුණු මෙහි දී ඔබට කියවා දැන ගත හැකිය.

පොතේ මිල රු.250/= ක් වන අතර එහි ISBN අංකය - ISBN 955-9496-04-2 වේ.

දෙවැනි කාරනේ තමයි පසුගිය සැප්තැම්බර් 05 දා සත් සමුදුරේ 100,000 වෙනි Page views අගයත් සටහන් වීම. ඉතින් ඒ ගැනත් ස්තූති කරන්න ඕන ඔබලා සියළු දෙනාටම තමයි. ඔබලා සත් සමුදුරට ආවේ නැත්නම් මෙබදු පිටු සංඛ්‍යාවක් සත් සමුදුරේ ලිපි පල කරන්නට පටන් ගෙන මාස 8 ක් පිරෙන්නට තවත් දින 8 ක් තිබියදී සනිටුහන් කරගන්නට නොහැකිවේවි. ඒ වගේම සහෝදර බ්ලොග් මිතුරන් රැසක්ම තමන්ගේ බ්ලොග්  අඩවියේ Blogroll එකේ සත් සමුදුර අඩවිය ඇතුළු කරල තිබීමෙනුත් පාඨක සහෘදයන් වැඩි වුනා. ඉතින් ඔවුන්ටත් මේ වෙලාවේ ස්තූතියි පිරිනමන ගමන්ම ඒ මිතුරන්ගේ බ්ලොග් අඩවි සත් සමුදුරේ Blogroll එකටත් දන්නා සෑම විටකම එකතු කර ඇති අතර සමහර අවස්ථාවල කුමක්දෝ දෝශයක් නිසා ඉතා ස්වල්ප බ්ලොග් අඩවි කිහිපයක් පමණයි එසේ තවම ඇතුළු කරගන්නට නොහැකි වී ඇත්තේ. එයටද අවකාශ ලැබුන හැටියේ ‍එක් කරගන්නට පුල පුලා බලා සිටින අතර ඔබගේ සහය ඉදිරියටත් අපේක්‍ෂා කරමි. ඒ වගේම තව අමතක නොකරම ස්තූති කරන්න ඕන සත් සමුදුරේ යාවත්කාලීන වන ලිපි නිරතුරුව දැන ගැනීමට සලස්වන සින්ඩිකේටර් සමූහය පිළිබදවත්. එක් නමක් හෝ අතහැරුනහොත් එය නුසුදුසු නිසා නම් වශයෙන් සදහන් නොකරත් ඒවා සියල්ලටමද මාගේ ස්තූතිය පිරිනමමි. ඒවගේම Facebook හරහා සත් සමුදුර පිළිබදව ප්‍රචාරය දෙන මිතුරන්ටත් ස්තූතිය පිරිනමන අතර Facebook හි ඇති Group වෙත සත් සමුදුර ඇතුලත් කර ගැනීම හා ඒවාට එක් වන ලෙස ආරාධනා කල ඒවා පවත්වා ගෙන යන මිතුරන්ටත් ස්තූතිවන්තවෙමි. ඒවගේම සිංහල වෙබ් අඩවි වලදී ලබා දෙන කමෙන්ටු වලදී ඒවාට යම් නෑකමක් සපයන ලිපියක් නම් එයට අදාල සබැදිය එහි පල කල විට මැදිහත් සිතින් එය ඉවසා එය ඉවත් නොකර සිටි වෙබ් අඩවි වල කතෘතුමන්ලාටද ස්තුතිය පුදකරමි. මෙහි සදහන් කිරීමට අතපසුවී ඇති සත් සමුදුර වෙනුවෙන් උදව් කල යමෙක් වේ නම් ඔවුන් ඒ ගැන කාරුණිකව ඉවසා ඔවුන්ද මාගේ ස්තුතිය පිළිගනු මැනවි.

එම සතුටුදායක සිදුවීම එසේ සිදුවෙද්දී සත් සමුදුරේ 161 වෙන බ්ලොග් සටහන වූ මුලින්ද කී හිට්ලර් ගැන නොදත් කතා හා පින්තූර ලිපිය ඊට පෙර අත‍්නොදුටු අත්දැකීම් රැසකින් යුක්ත වූ බව කිව යුතුයි. වරෙක ලිපිය ප්‍රශංසාවටත්, වරක මධ්‍යස්ථ ප්‍රතිචාරයකටත්, තවත් විටක දෝශදර්ශනයටත් ලක්වූ බව පැවසිය යුතුයි. එහි මෙම කරුණු වලට අදාලව පිළිතුරු සදහන් කලද තාක්‍ෂනික ගැටළු හේතුවෙන් දීර්ඝ පැහැදිලි කිරීම කල නොහැකි වූ අවස්ථාවලට මෙහිදී යම් පිළිතුරක්ද සටහන් කිරීමට සිතුවෙමි. මේවා බොහෝමයක් නිර්නාමික ලෙස එනම් ඇනොනීමස් ලෙස පල කරතිබූ අතර තමන් දරනා මතයක් වෙනුවෙන් නිර්භීතව තමන්ගේ අනන්‍යතාවය තහවරු වන සේ අදහස් පල කල නොහැක්කේ ඔවුන්ටද තමන් දරනා මතය පිළිබදව සැකයක් ඇති නිසා විය යුතුය.එහෙත් සමහර පාඨක මිතුරන් තාක්‍ෂනික වශයෙන් ඇති නොදැනුවත් කම් නිසා ඇනෝනීමස් ලෙස සටහන් කර ඇතත් තමන්ගේ අනන්‍යතාවය කමෙන්ටුව තුල ලියා ඇති බව කෘතවේදීව අවධාරණය කල යුතුය.

මෙන්න එක් කමෙන්ටුවක්. මෙය එම අය සටහන් කල අයුරින්ම මෙහි සදහන් කරමි.
//මාවෝ සේතු0 හ හිට්ලර්ව සමාන කරන්න බෑ.මවෝ කලේ පීඩනයෙන් මිරිකිලා හිටපු ජනතාවට සටන්කරලා විමුක්තිය උදාකරපු ඵක.ඕනෑම සටනකින් වගේම ඵ්සටනිනුත් මිනිසුන් මෑරුනත් සදාකල් මෑරීමෑරී ජීවත් උන චීන ජනතාවට මවෝ ලා උදාකරලා දුන් විමුක්තිය ගෑන කියන්න ඔන නෑනේ.
දෑන් චීනය ඉන්න තත්වය බලලාම හිතාගන්න පුලුවන්.
ඵදා අසියාවේ රෝගියා,අද ලෝකයේ දියුනුමරට.
ඵ් චරිත දෙක සමාන කරනව කියන්නේ දුටු ගෑමුනු රජතුමයි ඵලාරයි සමාන කරනවා වගේ වෑඩක්.//

මෙයට දිය හැකි පිළිතුර වන්නේ චීනයේ මිනිසුන් සැබෑ විමුක්තිය ලැබුවාදැයි කියන්නට ඕනෑ චීනයේ මිනිසුන්මය. එයට පරිභාහිරව සිටින මිනිසුන් ඔවුන් ලැබූ විමුක්තිය ගැන මෙසේ බොහොම සතුටෙන් අධිවිශ්වාසයෙන් යුතුව සටහන් කිරීමට දිය හැක්කේ අපගේ මිතු‍රන් ඒ කාලයේ කියපු  විහිළු කතාවකිනි. මට මතක හැටියට එය මෙසේය අත් දෙකම නැති මිනිසෙක් දගලමින් සිටිනවා හොදින් අත් පා ඇති අයෙකු දැක ඇත. ඉතින් ඔහු මෙය දැක අර අසරණ මනුස්සයාගෙන් අසා ඇත්තේ "ඔහේට අත් දෙකම නැතත් හරි සතුටෙන් නට නටා ඉන්නවානේ". එවිට අර අත් දෙකම නැති මනුස්සයා දී ඇති පිළිතුර වන්නේ " තමුසේ බණ කතා කරනවද? මම මේ ........(එම වචනය මෙතැන සටහන් කල නොහැක) කසා ගන්න බැරුව දගලනවා" යන්නයි. අන්න එවැන්නක් තමයි චීනයේ පිටත සිට, එම මිනිසුන් ලබා ඇති විමුක්තිය පිළිබදව සුන්දර මවාපෑමක් පිටස්තරයන් කරන්නට යන විට චීන වැසියෙකුද දෙනු ඇත්තේ.

එයින් විමුක්තිය ලැබූ අයත් ඇති. එය නැහැ කියන්නේ නැහැ.  මෙම කමෙන්ටුව ලබා දුන් මිතුරා කරුණාකර චීනයේ 1966 සිට 1976 දක්වා සිදුවූ මාවෝගේ ආශිර්වාදයෙන් හා මෙහෙයවීමෙන් සිදුවූ සංස්කෘතික විප්ලවය නැතහොත් Cultural Revolution ගැනත් කියවන්න. එය ගැන ඉදිරියේදී සත් සමුදුරෙන් සවිස්තරාත්මකව ඉදිරිපත් කිරීමට බලාපොරොත්තුවන අතර දැනට ඒ හා සබැදුන සබැදියන් කිහිපයක් ලබාදෙන්නම්.(http://en.wikipedia.org/wiki/Cultural_Revolution
http://en.wikipedia.org/wiki/Gang_of_Four
http://www.sjsu.edu/faculty/watkins/cultrev.htm) තව සබැදියන් ඕනෑතරම් ති‍බේ‍.

සංස්කෘතික විප්ලවය පිළිබදව
එකල නිර්මාණය වූ පෝස්රටයක්

Deng Xiaoping

මෙහිදී මිය ගිය මිනිසුන් සංඛ්‍යාව පිළිබදව නිශ්චිත වශයෙන් යමක් දැනට කීමට නොහැකි වූවත් එයට සම්බන්ධ වූවන් 1981 දී චීන රජය විසින්ම අධිකරණය හමුවට පමනුවනු ලැබූ අතර එහි ප්‍රධාන චරිතවූ Gang of Four කල්ලියේ කැපී පෙනෙනම චරිතයක් වන Lin Biao නම් හමුදා නිලධාරියා 1971 දී අභිරහස් ගුවන් යානා අනතුරකින් මිය ගිය අතර ඉතිරිව සිටි අනෙක් අයගෙන් ප්‍රධානතම චරිතයක් වූයේ මාවෝගේ තෙවන බිරිද වන Jiang Qing වේ. ඔබ කියනා මෙසා දියුණු චීනයේ නිර්මාතෘවරයා Deng Xiaoping බව ඔබ තව දුරටත් ඒ ගැන සිහිබුද්ධියෙන් සොයා බැළුවේ නම් දැනගනු ඇත. තවද ලෝකයේ හැම දේකටම අපේ රටේ සජීවි හෝ අජීවී චරිත හෝ දේවල් සමග සන්සන්දනය කරන්නට යෑම තර්කානුකූල නොවන බවද කාරුණිකව දන්වා සිටිමි.

සංස්කෘතික විප්ලවයේ ප්‍රධාන නියමුවන්
අධිකරණයට ඉදිරිපත් කල අවස්ථාව

ඒ වගේම 1989 දී චීනයේ තියෙන්මාන් චතුරස්‍රයේදීද එරට මිනිසුන් 1000 කට පමණ සදාකාලික විමුක්තිය ලබා දීමට මාවෝ ගේ අනුප්‍රාප්තිකයේ ත්‍යාගශීලී වූහ.
http://en.wikipedia.org/wiki/Tiananmen_Square_protests_of_1989

මෙන්න තවත් කමෙන්ටුවක්;
//ඔය ලිස්ට ඵකේ ඈමරිකාව වියට්නාමේ කරපු ගාතන ඉරකේ ඈෆ්ගනිස්තනේ ඔබාමලා බුශ් ලා කරපු ගාතන ඵහෙම නෑත්ද?ඵතකොට ෆිනෝචේ ලා වගේ ඈමරිකන් රූකඩ කරපු ගාතන ඵහෙන නෑත්ද?
සත් සමුදුර ඈමරිකවේ වෑසිකිලිවල කරන්න ඵපා.//
කොහේද යන්නේ ඇහුවහම, මල්ලේ පොල් වැනි කමෙන්ටුවක් දීමෙන් අදහස් කලේ කුමක්ද? සමස්ථ ලිපිය පිළිබදව අවධානය යොමු නොකර කිසියම් සංසන්දනාත්මක නිරූපනයක් කෙරේ උරණවූයේ මන්දැයි? පැනයක් නැගේ. ඇමරිකාව වියට්නාමය කරන ලද දේ හෝ වෙනයම් යුද්ධවලදී ඔවුන් ලැබූ අපකිර්තිය පිළිබදවද මෙන්ම සෝවියට් දේශය ඇෆ්ගනිස්ථානයේ යුද්ද කරන්නට ගොස් අනාගත් හැටි ඉඩලැබෙන අයුරින් සත් සමුදුරේ පල කරන්නට බලාපොරොත්තුවෙන් සිටින මොහොතකම තමයි ඔබ ‍මේ වගේ අපූරු කමෙන්ටුවක් දී ඇත්තේ. ඔබමා කරන දේවල් ගැන යම් සටහනක් මෙම ලිපිය ආරම්භයේද පැවසූ   NATO සංවිධානයේ මූලික සංකල්පයෙන් බැහැරව ගොස් තවත් රටක් උලාකෑමේ අභිප්‍රාය සාක්‍ෂාත් කර ගැනීමේ අරමුණ සඵල කරගැනීමේ අභියස සිටියදී ලියමි... ලිපියේ ඇත. පිනෝචේ පමනක් නොව ඉතිහාසයේ හමුවෙන සියළුම කෲර පාලකයන් ගැන ලැයිස්තු ගත කිරීමට ගියහොත් ඔබගේත් මගේත් ජීවිත කාලයත් සමහර විට මදිවේවි. ඔබ සත් සමුදුර මුල සිට කියෙව්වා නම් එහි මෙම සියළු පාර්ශව කෙරේ මැදහත් සිතින් යුතුව විමසා ඇති බව වටහා ගනීවි. එසේ නැතුව මෙවැනි අදහසක් ඔබ පලකිරීම "පිටස්තර ජීවියෙකු සහරා කාන්තාරයට පැමිණ පෘතුවිය ජීවයෙන් තොර ග්‍රහලෝකයක්ය" යන නිගමනයට එළඹීම වැන්නක් නොවෙද? තවද ඔබ බලාපොරොත්තුවෙන් පැමිණියේ ඔබ අදහස් කරන පරිදි සත් සමුදුර නැමති ඇමරිකානු වැසිකිලි වලට පිවිස තළු මර මරා ඇමරිකාවට, බටහිර අධිරාජ්‍යවාදයට, බටහිර කුමන්ත්‍රන වලට අන්තගාමී ලෙස  දොස් පවරනු දකින්නටද?

මෙන්න තවත් ඉතිහාසය "හොදින්" හැදෑරු මිතුරෙක් දුන් කමෙන්ටුවක්;

//ඉතිහාසය දන්නෙනෑතුව කරපු නියම ජෝක් කමෙන්ට් ටිකක් තියනවා.
සෝවියට් හමුදාව ලොකු පොඩ් බේදයකින් තොරව ස්ත්‍රී දූශන කලානම් බර්ලිනය සහිතව ජර්මනියේ නෑගෙනහිර කොටස සමාජවාදය පිලිගත්තේ ඈයි?ජර්මන් ගෑනු රුසියන් කාරයන්ව වරදට පොලබවගත්තද දන්නෑ.
JRපප්පා ඉතිහාසය වගේ දේවල් පෙලපොත්වලින් අයින්කිරීමේ ප්‍රතිපලය තමයි මේ.
නියමඉතිහාසය නොදෑන බෝතල්-පත්තරකාරයෝ දේශපාලන කන්නඩි දාගෙන ලියන පච හෑලි ඈත්තසේ පිලිගෑනීම.
ඵහෙමනෑත්නම් බටහිර මාද්ය කියන හෑමබොරුවම ඈත්ත කියලා හිතීම මාර චාටර්.
අනික ඈමරිකාව 2වන ලෝක යුද්දයේ නියම සතුරාවන ජර්මනිය අත ඈරලා අසියාතික ජපානයටම පරමානු බෝම්බය දෑම්මේ ඈයි?
සතුරා උනත් සුදුහමට තියන නිසා කියලත් කතාවක් තියනවා.//

මෙන්න මෙහෙමයි ජර්මනිය දෙකඩ වීම හා නැගෙනහිර පැත්ත සමාජවාදී වුනේ එය මේ ලිපියට ප්‍රධානවූ පොතෙත් දැකගන්න පුළුවන්. ජර්මනිය දෙකට බෙදීම තීරණය වුනේ යුද්දය කෙරීගෙන යන අතරතුරයි. යුද්ධයෙන් පසු ජාත්‍යන්තරය හා ජර්මනියේ ඉරණම කෙසේවිය යුතුදැයි යුද්දයට පෙර අවස්ථා ගණනකදී මිත්‍ර පාර්ශ‍වයේ රටවල් වල නායකයන් අතර සමුළුවශයෙන් පැවැත්වුන අතර එහි තීරණාත්මක අවස්ථාව 1945 පෙබරවාරියේ යාල්ටාහි පැවති සාකච්ඡාවයි. එහිදී ජර්මනිය අත්පත් කරගත් ප්‍රදේශ වශයෙන් දෙකඩ කොට බටහිර පැත්ත ඇමරිකාව, එංගලන්තය ප්‍රමුඛ බටහිර පාර්ශවය වෙතටත් නැගෙනහිර කොටස සෝවියට් පාලනයටත්, බර්ලින් නගරය මෙම සියළු ජාතීන්ගේ පාලනයටත් නතුකිරීමටත්ය. මෙන්න ඒ ගැන සටහන් කරන ලද විකිපිඩියා සටහනට අදාල සබැදිය. මෙසේ සමාජවාදය ස්ථාපිත කල නැගෙනහි‍ර ජර්මනියේ ‍සෝවියට් හිතවාදී රූකඩ ආණ්ඩුවක් පිහිටවූ අතර නැගෙ‍නහිරි යුරෝපයේ සෝවියට් දේශයට අයත් නොවූ රටවල් බොහෝමයකම නැගෙනහිර ජර්මනියේ වැනි සෝවියට් හිතවාදී රූකඩ ආණ්ඩු පිහිටවනු ලැබූහ. මෙම තත්වයෙන් ගැලවී සිටියේ Josip Broz Tito නැතහොත් Marshal Tito ගේ නායකත්වයෙන් යුතුවූ යුගොස්ලෝවියාව පමණක් වූ අතර Tito නොබැදි ව්‍යාපාරයේ පළමු මහලේකම්වරයාද විය.
http://en.wikipedia.org/wiki/Yalta_Conference
http://en.wikipedia.org/wiki/Josip_Broz_Tito

Marshal Tito

යුගොස්‍්ලෝවියාව කැබලිවලට කැඩීයාමට පෙර

දෙවැන්න ස්‍ත්‍රී දුෂනය ගැනයි. ඔබ පවසනා අයුරින් මෙම හමුදාවේ සිටින්නට ඇත්තේ සියළු කෙලෙස් ප්‍රහීන කල අඩුම තරමින් සෝවාන්භාවයට හෝ පත්වූ පුන්‍යවන්තයන් විය යුතුය. ඔවුන්ට සිය පීතෘභූමිය (සෝවියට් දේශය හදුන්වන්නේ පීතෘ භූමිය ලෙස බවද සලකන්න.) පර ජර්මානු සතුරන්ගෙන් මුදවා ඔවුන්කෙරේ වෛරය උපදවා ගන්නේ නැතුව, එහිදී තමන්ගේ රටේ කාන්තාවන්, ලමුන්, මහල්ලන් යන නිරායුද මිනිසුන්ට 1941 Operation Barbarossa නම් මෙහෙයුමේ පටන් දුන් වද වේදනා අමතක කොට වෛරයෙන් වෛරය නොසන්සිදේ යන පෙරදිග බෞද්ධ උතුම් ආකල්පය පෙරදැරි කරගෙන ජර්මනියට කඩා වැදී, ඔවුන්ගේ අවි ගත්තන්ට පමනක් ලාවට පොඩි ෂොට් එකක් දී කාන්තාවන් කෙරේ අතිමහත් වූ ගෞරවයකින් යුතුව හිට්ලර් නම් මරුමුස් මිනිසාට "කැමති නම් අපට භාර වෙන්න. භාරවී අප සමග නැවත ජර්මනිය ගොඩනගන්න එකතුවෙන්න" යයි පැව‍සුවේ කියාද? එසේ කී විට හිට්ලර් තමන් කල දේවල් පිළිබදව අතිමහත් ලෙස ලැජ්ජාවට හා ශෝකයට පත්වී තමන් විසින්ම සියදිවි නහගත්තා කියාද? මෙම දුඛිංත දේවල් දැකීමෙන් සියල්ල හැරදා යන්නට ගිය සෝවියට් සොල්දාදුවන්ට බලෙන්ම ඇදගෙන ගොස් ඔවුන්ව දූෂනය කර ඔවුන්ට ජර්මනියේ නැවතීමට සිත් පහල කරවා ගෙන අපි නම් කැමති සමාජවාදයට යයි කියා ඔවුන් ලවා අල්ලපු වත්තේ බටහිර ජර්මනියේ සුඛවිහරණ දැක පැනයන්නන් වැලකීමට 1961 දී බර්ලින් තාප්පය නම් පවුරක්ද බදවා ගෙන එය 1989 දක්වා හුණු පිරියම් කොට නිරතුරුව නඩත්තු කොට තමන් විසින්ම කටුකම්බ් හා අනෙකුත් බාධක යොදවා ගෙන සිටියාදැයි කියාද? කරුණාකර මොන ඉතිහාස පොතේද එම කරුණු තිබෙන්නේ? කරුණාකර අපිටත් දැනගන්නට මූලාශ්‍ර සපයන්න. තවත් දෙයක් කිව්වොත් හොදයි කියා සි‍තේ නැගෙනහිර පෙරමුනෙන් සෝවියට් හමුදා ජර්මානු ප්‍රහාරද නොතකා ඉදිරියට ජයග්‍රාහී ලෙස ඉදිරියට ඇදෙන විට පසුබැස ගිය ජර්මානු සේනාංක වල ලක්‍ෂ ගණනක් වූ සොල්දාදුවන් සිය ජනරාල්වරුද පෙරටු කොටගෙන ඇමරිකාව ප්‍රමුඛ බටහිර පෙරමුණට ගොස් භාර වී ඇත්තේ තමන් සෝවියට් සොල්දාදුවන්ට භාරවන්නට ගියහොත් ලැබෙන "සැලකිලි" ගැන දන්නා බැවිනි. ඒ ගැනත් සටහන් ඇති පොතක් ඉදිරියේදී පල වන ලිපියකදී ඉදිරිපත් කරමි.

Operation Barbarossa නම් මෙහෙයුම සිදුවූ ආකාරය

මේ අල්ලපු වත්තේ සිටින සිය මවට කතා කරන දියණියක් නොවේ. නැගෙනහිර ජර්මනියට වඩා ජීවන තත්වය බටහිර ජර්මනියේ යහපත් වූයෙන් එම පැත්තට පැන ගිය දියණිය තවමත් නැගෙනහිර පැත්තේ සිටිනා සිය මවට කතා කරනා සේයාවරුකි

මේ නැගෙනහිර ජර්මානු‍ සීමාව රැකගැනීමේ යෙදී සිටි සොල්දාදුවන් විසින් වසර 28 ක් තිස්සේ තමන් විසින්ම ආරක්‍ෂා කල බර්ලින් පවුර බිද දමන අයුරුයි දිනය Nov. 11, 1989
(බර්ලින් තාප්පය ගැන ලිපියක් 2011 සැප්. 06 ලක්බිම පුවත් පත සමග පැමිණි සමුදුර පුවත් පතේ ඇත)‍.

තවද වැඩිදුරටත් කිවයුත්තේ මෙහි ඔබ නිග්‍රහ කර ඇති මෙම //සෝවියට් හමුදාව බර්ලින් නගරයේ විසූ කුඩා දැරියගේ සිට වයසක මැහැල්ල දක්වා වූ බහුතරයක් කාන්තාවන් දූෂණයට ලක් කළ බව සඳහන් වෙනවා. එහි අගය 95,000-130,000 පමණ වන බව සඳහන් වේ. // අදහස සම්බන්ධයෙන් එය සදොස් යයි ඔබ අදහස් කරන්නේ නම් එය සනාථ කල හැකි මූලාශ්‍ර වෙතොත් කරුණාකර සදහන් කරන්න..

කෙසේවෙතත් බටහිර මාධ්‍ය කියනා සෑම දෙයම ඇත්ත කියා මා නම් කෙබදු අවස්ථාවකවත් සිතා නොමැති අතර, ඔබ එසේ කවදා හෝ පිළිගෙන ඇද්ද?

එසේම ඔබ කියනා පරිදි නියම සතුරා වන ජර්මනිය ‍මඟහැර ජපානයට පරමාණු බෝම්බ දැමු බවට චෝදනා කරන්නේ ජර්මනිය මිනිසුන් සුදු හම ඇති නිසා බවයි.
මෙන්න ඔබ දැනගත යුතු කරුණු ජර්මනිය යටත් වී සමස්ථ‍ දෙවන ලෝක යුද්ද භූමිකාවෙන් 1945 මැයි 01 වනදා ඉවත්වීම සිදුවිය (http://en.wikipedia.org/wiki/End_of_World_War_II_in_Europe). නමුත් ජපානය යුද්දයෙන් ඉවත්වීමක් සිදුනොවීය. එසේම දෙවන ලෝක යුද්දයේ නිමාව පෙනෙන අවස්ථාව වන විට සෝවියට් දේශයේ බලපරාක්‍රමය හොදින් පෙනෙන්නට වූ අතර ජපානයට එරෙහිව යුද්දයේදීද සෝවියට් සහය අවශය බව එංගලන්තයට හා ඇමරිකාවට පිළිගැනීමට සිදුව තිබුනි.මන්ද ඒ වන විට පරමාණු බෝම්බය සොයා ගෙන නොතිබූ නිසා මෙන්ම මරාගෙන මැරෙන්න තරම් නිර්භීත තත්වයක් පෙන්වූ මෙන්ම සිය පූර්ණ හමුදා ඇදුමෙන්ම පැමිණ යුද පෙරමුණ මෙහෙයවූ ජපාන ඉහල නිළධාරීන්ගේ යුදකාමීත්වය නිසා සිය පාර්ශවයේ සිදුවිය ජීවිත හානි අතිමහත් සංඛ්‍යාව පිළිබදව මෙම රටවල බියක්ද විය.. එසේම සෝවියට් ‍දේශයද තම සාම්ප්‍රධායික සතුරාවන ජපානයෙන් පලි ගැනීමට අවස්ථාවක් සොයමින් සිටි අතර 1904-1905 කාලයේදී ජපානය හා එවකට රුසියාව අතර මැන්චූරියා සටනින් ජපානයට ජය අත්ව තිබින.‍ මෙන්න ඒ ගැන දැනට මෙතනින් දැන ගන්න. පසුකලෙක සත් සමුදුරේ ඒ ගැනද සවිස්තර ලිපියක් ගෙන එන්නම්. http://en.wikipedia.org/wiki/Russo-Japanese_War. මුලදී මෙම තත්වය තිබුනත් පරමාණු බෝම්බය සොයා ගැනීමත් සමගම මෙම තත්වය වෙනස් වන්නට විය. එහිදී සෝවියට් දේශය යම් හෙයකින් ජපානය ආක්‍රමණය කර එම යුද්දය ජයග්‍රහණයෙන් පසු එයද කොමියුනිස්ට් රටක් බවට පත්වීමත්, රුස්වෙල්ට්ගේ හදිසි අභාවයෙන් පසුව පත්වූ ටෲමන් ජනාධිපතිවරයාට අන්තර්ජාතික කටයුතු කෙරේ එතරම් නිපුණතාවයක් නොතිබුනා මෙන්ම ඔහුට ඉක්මනින් යුද්දය නිමා කිරීමේ අවශ්‍යතාවයත් මත තමන් අළුතින්ම සොයාගත් භයාණක ආයුධය ජපානය මතට හෙලන්නට තීරණය කලහ. මෙම කාරණ වලට අදාල තවත් විස්තර මිනිසා විසින් සිදු කර ඇති ලොකුම න්‍යෂ්ඨික පිපිරීම ලිපියේ සහ එහි ක‍මෙන්ටු වල අන්තර්ගතවේ.

ජපානයට පරමාණු බෝම්බ දැමීමෙන් සිදුවූ අතිශය බිහිසුනු අත්දැකීම ඉතාමත් නින්දිත මෙන්ම කිසිසේත් අනුමත නොකරන අතර අතිශයින් යුදකාමී ජාතියක් වූ ජපානය දෙවන ලෝක යුද සමයේදී ඔවුන් අත්පත් කරගෙන සිටි චීනයේ පිහිටුවා තිබූ Unit 731 නම් සේනාංකය මගින් සිදුකරන ලද අතිඅමානුශික අත්හදා බැලීම කියවන විට පවා බියට  පත්කරවන සුළුය.
http://en.wikipedia.org/wiki/Unit_731
http://naturalplane.blogspot.com/2010/02/japans-unit-731-auschwitz-of-east.html

ජපාන Unit 731සේනාංකයේ කෙරුම්කාරකම්

එසේම ඔවුන් විසින් යටත් කරගත් රටවල් ගණනාවක කාන්තාවන් සිය සොල්දාදුවන්ගේ මනදොල පිනවීමට නැතහොත් ලිංගික වහලුන් (Comfort women) ලෙස යොදාගත් අතර එම තත්වය නැගෙනහිර ආසියාතික රටවල් ගණනාවක තිබූ අතර එයින් කොරියානු අර්ධත්වීපය එයින් සුවිශේෂ විය. මෙන්න ඒ ගැනත්
http://en.wikipedia.org/wiki/Comfort_women
http://en.wikipedia.org/wiki/Japanese_war_crimes
http://www.religioustolerance.org/sla_japa.htm

දැන්වත් ඔබ ඉතිහාසය පිළිබදව යම් අවබෝදයක් ලබා ගත්තේද?

මෙන්න මේ ඇනෝනිමස් කමෙන්ටු වල ඇති මේ කොටස්  වලට පිළිතුරක් දීමට බලාපොරොත්තුවන අතර ඉතිරි ඒවා බොහෝමයකට රවී විසින් මොහුට මධ්‍යස්ථ පිළිතුරු ලබා දී තිබූ අතර මොහු ඒවා පිළිගන්නවාද ? නොගන්නවාද? යන්න ඔහුගේ කටයුත්තකි.

 //අනික ඔය ඔරලෝසු ගල්කරපුවා,රේප් කේස් ගෑනත කියන්න ඔනේ.රතු හමුදාව කියන්නේ බොහොම විනයවත් හමුදාවක්.නෑත්නම් මෙහෙම ජයග්‍රහනයක් ලබන්නත් බෑ.තමන්ගේ සතුරගේ ජයග්‍රහනයට ඵරෙහිව ඈමරිකන් මාද්ය හෑසිරෙන්නෙ බොහොම වියරු විදියට.//
//දෙවන ලෝක යුද්දයේ රුසියානු පසෙන් සටන්කරපු ෆිල්ඩ් මර්ශල් ශුකොව්,ප්‍රකට ස්නයිපර්කරු වසිලි සයිට්සේව්,ලුඩ්මිලා පව්ලිචෙන්කෝ,නීනා ඔලනීවා වගේ වීර සෙබලසෙබලියන් ගෑන කියවන්න, ලියන්න.//


//උදාහරනයක් ගන්න සෝවියට් ජනතාව නෑපෝලියන් හා හිට්ලර් පෑරදවීමේ ප්‍රදාන සාදකය කටුක සීතල බව කීම විහිලිවට කරුනක්.//

//අනික මේ ආන්ඩුවෙන් ල0කවට ලෑබුනු දේවල් දන්නවාද?ජර්මන් ටෙක් ඵ්ක,වානේ ස0ස්තව ව්ගේ දේවල් ලෑබුනේ ඵ් ඵ්කාදිපති ආන්ඩුවෙන් තමා.//

//මා සදහන්කල බොහෝ විස්තර විකීපීඩියාවෙන් උවද ලබාගන්න පුලුවන්.අවාසනාවකට තාක්ශනය ගෑන ලොකු දෑනීමක් නෑති අපට ලින්ක් දාන්න නම් තේරෙන්නෑ.සෑකනම් විකීපිඩියාවට ගොස් බලන්න.//

//දෑනුම ගනිකා වෘත්තියේ යෙදවීම මෙය නොවෙද?//

//අවසාන වශයෙන් මෙසේ ලියමි.මට රුසියානුවන් වෙනුවෙන් පෙනීසිටීමට කිසිම කෑසිල්ලක් නෑත.
නමුත් හුදෙක්ම් බටහිර මාද්ය වාර්තාමත පදනම්ව ලිවීමෙන් ඉතිහාසය විකෘති වෙනවා පමනක් නොව ද්‍රෝහීන් වීරයන් වී වීරයන් ද්‍රේහීන්වේ.
ඔබල දෑන හෝ නොදෑන කරමින් සිටින්නේ ඵයයි.
තමන්ගේ දිවිකුසුම සකල ලෝකවාසී ජනයා වෙනුවෙන් පරිත්යාග කල නියම වීරයන් යටගොස් කාඩ්බෝඩ් රම්බෝ වීරයන් උඩ දෑමීමට විරුද්දව ලීවෙමි.//

ඔබේ බසින්ම කියනවා නම් ඔරලෝසු ගල් කරපු සිද්ධිය ගැන ඉදිරියේදි අදාල මූලාශ්‍රය නැවත සොයා ගත් වහා පිළිතුරු ලබාදෙන්නම්. රේප් කේස් පිළිබදව ඔබට ඔතරම් සහතිකයක් දෙන්නට තරම් නිවැරදිවම ලැබුන දත්ත කරුණාකර ඉදිරිපත් කරන්න.මේ පිළිබදව යම් විස්තරයක් මෙම ලිපියේ පෙරදීද මා කියූ අතර එසේ බෝසත්වරු සටන් කල හමුදාවක් පිළිබදව ඔබ දෙන චරිත සහතිකය අපට පිළිගැනීමට එය ඉතා වැදගත්ය. නමුත් ඇමරිකානු හමුදාවේ සිටියේ මහ වල් පෝරිසා‍දයෝ පිරිසක් විය යුතුය. මන්ද ඔවුන්ගේ ආණ්ඩුව මෙම කාලවකවානුවේ  ඔවුන් ඉලක්ක කර ගනිමින්ම සමාජ රෝගවලින් වැලකී සිටීමට අවශ්‍ය පණිවිඩ රැගත් පෝස්ටර් පෙලක්ම ඉදිරිපත් කරන ලදි. සත් සමුදුරේ පලවූ අද ඒඩ්ස් ව්‍යවසනයට මෙන් එදා සිෆිලස් හා ගොනෝරියාවලට අවහිර කල හැටි +18 - STD Prevention Posters ලිපියේ තිබුනේ එම පෝස්ටර් සමූහයයි.

තවද එකල සෝවියට් දේශ‍යේ බහුතරයක් ශක්තිමත් පිරිමින් යුද භූමිය කරා යැවුන අතර කාන්තාවන් නිර්භීත ලෙස ගොවිතැන් කටයුතු, අවි ආයුධ නිශ්පදනය කරනා ලද බව මධ්‍යස්ථව හා ප්‍රශංසා කරමින්ම පෙන්වන්නේ ඔබ ‍චෝදනා කරනා බටහිර මාධ්‍යන් වන BBC ආයතනය මගින්ම නිපදවා ඇති World at the War වාර්තා චිත්‍රපටියෙන්මය. තවද ඔබ කියනා අයුරින් මූලික හමුදා පුහුණුවක් විනා ඔවුන්ට සදාචාරය හා විනය උගන්වමින් කාලය ගතකරන්නට එදා ස්ටාලින්ට වෙලාවක් නොතිබුනි. එසේ කරා නම් ඉතිහාසය ලියන්නට වෙන්නේ වෙනත් අයුරකින්ය.

එසේම ඔබලා දේවත්වයෙන් හා අන්ධභක්තියෙන් සලකන්න යයි නිර්දේශකරනා ජෝස‍ෆ් ස්ටාලින් 1932-1933 කාල වකවානුවේ යුක්රේනයේ අතිවිශාල මිනිසුන් සංඛ්‍යාවක් කෘත්‍රීම සාගතයකට ලක්කර මියයාමට සැලැස්වීම ගැන කියන්නට කරුණු තිබේද? (මේ මියගිය සංඛ්‍යාව බොහෝ මූලාශ්‍ර වල මිලියන 7 ක් ලෙස දක්වා තිබෙන බවද සලකන්න. වැඩිදුරු විස්තර සදහා පහත දැක්වෙන සබැදියන් පරීක්‍ෂා කරන්න. මෙම  මිනිසුන් මියගියේ ගුලාග් කදවුරු වල මියගිය මිනිසුන්ට පරිභාහිරවය).
http://en.wikipedia.org/wiki/Holodomor
http://www.infoukes.com/history/famine/
http://www.infoukes.com/history/famine/gregorovich/
http://www.historyplace.com/worldhistory/genocide/stalin.htm

1932-1933 සාගතයට ගොදුරුව මන්දපෝෂනයට
ලක්වූ යුක්රේන දරුවෙක්

ඒ වගේම එම ලිපියේ කිසිම තැනක සෝවියට් හමුදා අවතක්සේරුවට ලක් කර නොමැති බවද කිවයුතුය. ඔවුන් කරනා ලද කැපකිරීම් හා නිපුනත්වය සැමදා ලෝ වැසි දනන් ගේ සිත් තුල තැන්පත්ව ඇත. ශීතල යනු එම සංග්‍රාමයේ එක් සාධකයක් පමණි. දැවැන්ත ජර්මානු බලඇනි වේගයෙන් ඉදිරියට ගමන් ගත් අතර ඔවුන් එක් තැනක කදවුරු බැද සිටි හමුදාවක් නොවේ. මේ බව ඔබට තවදුරටත් දැනගැනීමට අවශ්‍ය නම් ජේ. ආර්. පී. සූරියප්පෙරුම මහතා ලියා ඇති දේශපාලන විග්‍රහය පොතද කියවන්න. එහි මෙම යුද්දය කෙරුන ආකාරය ඉතාමත් සිතට දැනෙන අයුරින් විග්‍රහ කර ඇත. එසේ  ඉදිරියට ඇදෙන සුවිශාල හමුදාවකට නිරතුරුවම ආහාර, ඖෂධ, ඇදුම් පැලදුම් සහ අනෙකුත් අවශ්‍යතා මෙන්ම පතරොම්, අකර්මණ්‍ය තත්වයට පත්වන ආයුධ වෙනුවෙන් නව අවි ආයුධ නිරතුරුවම සැපයීම හිතනා තරම් සරල පහසු දෙයක් ලෙස ඔබ සිතන්නේද?  ලෝකයේ විශාලම රටවු සෝවියට් දේශයේ රට අභ්‍යන්තරය තුලට ඇදෙන සුවිශාල හමුදාවකට ශීත ඍතුවේදී සැපයීම් කටයුතු කරන්නේ ඒ කාලයේ මොන ආකාරයෙන්ද? ඔබ හිතනා තරම් සැලසුම් සහගත බවක් යුද්දයේ මුල මෙන් පසු කාලෙක ජර්මානු පාර්ශවයෙන් යුතු නොවූ අතර යුද බූමියේ අත්දැකීම් ඇති ජනරාල්වරුන්ගේ නිර්දේශද බැහැරකරමින් හිට්ලර් තමන්ගේ අභිමතය පරිදි අවසාන කාලයේ යුද්දය මෙහෙයවූ බවට සාක‍්‍ෂි ඇතුලත් පොතක් පිළිබදවද ඉදිරියේදී සත් සමුදුරේ පල කරන්නෙමි.

ඔබද සදහන් කරන ප්‍රකට ස්නයිපර්කරු වසිලි සයිට්සේව් ගැන Enemy at the Gates නම් ඔහුට ප්‍රශංසා කරමින් චිත්‍රපටියක් මෑතකදී හැදුවේ බටහිර හොලිවුඩ් සිනමාවෙන් බව ඔබට අමතකද? නැත්නම් උවමනාවෙන් අමතක කලාද? එහි ස්ටාලින් ගැනද ඉතාමත් ගෞරවයෙන් යුතුව සදහන් කරන බව ඔබ දන්නේද?

තවද දෙවන ලෝක යුද්දයේ ජර්මානු Generalfeldmarschall Rommel ගේ ප්‍රතිවාදියා වූ ඇමරිකානු ජනරාල් George.S.Patton පිළිබදව චිත්‍රපටියක් තැනුවේද මෙම බටහිර හොලිවුඩ් සිනමාවෙන්ම වන අතර එහිදී ඔහුගේ හමුදාමය දක්‍ෂතා කොතෙක් තිබුනද ඔහුගේ දුර්වලතා, කටමැත දෙඩවීම හා අහංකාරකම, හේතුවෙන් තරු හතරේ ජනරාල් වරයෙකු වී සෑහීමටත්, තමන්ට වඩා කනිෂ්ඨ වූ ජනරාල් Omar Nelson Bradley ට දෙවැනි වන්නට සිදුවූ බව පෙන්වන චිත්‍රපටියකුත් තනා ඇති බව දන්නේද? ඔවුන්ට අවශ්‍යවුනි නම් සිය හමුදා නායකයාගේ දක්‍ෂතා පමණක් පෙන්වන චිත්‍රපටියක් තනන්නට තිබුනා නේද?

http://en.wikipedia.org/wiki/George_S._Patton

http://en.wikipedia.org/wiki/Omar_Bradley

ඇමරිකානුවන් වියට්නාමයේ අනාගත් බව කවුරුත් දන්නා දෙයකි. නමුත් එහි ලැජ්ජාව යම් පමනකින් වසා ගැනීමටයි රම්බෝ වැනි චිත්‍රපටි තැනුවේ. ඒ එක්කම යුද්දයේ ඇමරිකානු නිරුවත පෙන්වන Platoon කියා චිත්‍රපටියකුත් ඔබට පිළිකුල් බටහිර විසින්ම තනා ඇති බව අමතකද? මෙයද ප්‍රමාණවත්නොවේ නම් වියට්නාම යුද්දය පිළිබදව සමබර දැකීමක් ඇති We Were Soldiers චිත්‍රපටියත් බලන්න.

 ලංකා-ජර්මානු කාර්මික අභ්‍යාස ආයතනය එහෙමත් නැත්නම් කවුරුත් දන්නා ජර්මන් ටෙක් ආයතනය ලංකාවට ලැබී ඇත්තේ බටහිර ජර්මනියෙනි. එහෙමත් නැත්නම් ධනවාදී ජර්මනියෙනි. ඔබට කවුරුන් එය නැගෙනහිර ජර්මනියෙන් ලැබුනාදැයි පැවසුවේදැයි නොදනිමි. මේ එම ආයතනයේ වෙබ් අඩවියේ History of CGTTI සබැදියට ගියවිට මුලින්ම දක්වා ඇත්තේ එයයි. මෙන්න එය තවදුරටත් පැහැදිලි කරගැනීමට;

මෙහි Federal Republic of Germany යනු එකල බටහිර ජර්මනියයි.
http://en.wikipedia.org/wiki/West_Germany

නැගෙනහිර ජර්මනිය හදුන්වන නිල නාමය  German Democratic Republic වේ.
http://en.wikipedia.org/wiki/East_Germany

ඔරුවල වානේ සංස්ථාව නම් 1961 දී සෝවියට් දේශයෙන් ලැබන බව නම් සත්‍යයකි.

අවශ්‍ය නම් මෙම කොටස ලබා ගත් ලිපියේ සබැදිය මෙයයි. 

මෙම කරුණු පවා ඔබ හරිහැටි අධ්‍යයනය කොට නොමැතිබව දැන්වත් පිළිගන්නවාද? මෙම ආයතන අපේ රටේ මිනිසුන්ගේ නැණනුවන වර්ධනය කරගන්නටත්, අපේ රටේ සංවර්ධනයටත් දායක වූ බව අවංකව මාද පිළිගන්නා අතර ඒවා ලබා දීම ගැන ඒ රටවලට ස්තූතියවන්ද වෙමි. එහෙත්  මේවා මොන රටෙන් ලබා දුන්නද ඒවා ලබා දුන් රටවල යම් කිසි ඉතිහාසගත අපකීර්තිමත් සිද්ධි යට ගැසීමට හෝ ඒවා සිදුනොවූවායැයි කීමට අල්ලසක් ලෙස සලකන ලෙසටද ඔබ මෙම කරුණ කමෙන්ටුවට ඇතුලත් කිරීමෙන් අදහස් කලේ?

ඔබට ඇයි සාක්‍ෂි ඉදිරිපත් කල නොහැක්කේ. ඒ සදහා දැනුම මදියයි කියන්නේ මන්ද? විකිපිඩියා වල ඔබ දේවභාෂිතය මෙන් ගරු කරන සත්‍ය තිබේනම් එහි සබැදියන් පිටපත් කර කමෙන්ටුව සමග අලවා ඉදිරිපත් කල නොහැක්කේ මන්ද? එයට දැනුම අවශ්‍ය නම් එයද නොසඟවා ලබා දීමට සූදානම් බවද සදහන් කරනු කැමැත්තෙමි.

//දෑනුම ගනිකා වෘත්තියේ යෙදවීම මෙය නොවෙද?// යන්නෙන් ඔබ අදහස් කලේ ඔබගේ මිත්‍යදෘෂ්ඨික ඉතිහාස දැනුම වපුරන්නට සහ ඒවා අනුමත නොකරමින් ඉතිහාසය විකෘතිකරන්නට ඉඩ නොදී මධ්‍යස්ථව මත පල කරන නිසාද?

දෙවන ලෝක යුද්දයේ ස්ත්‍රී දූෂන ගැන ඔබ දෙන චරිත සහතික නිසා 90 දශකයේ යුගොස්ලෝවියාවේ සිදුවූ බොස්නියන් යුද්දයේදී එනම් ප්‍රධාන වශයෙන් Bosnia and Herzegovina යන ප්‍රාන්ථ රාජ්‍ය දෙක අතර සිදුවු යුද්දයේදී ස්ත්‍රී දූෂනය යනු නිතරම කියවෙන මෙන්ම එම යුද්ධයේ දැඩි කම්පනයට ලක්කල අතුරු සිදුවීමක් විය. එහිදී 20-30 වතාව දූෂනය වූ ගැහැණුන් ගැන කියවුන අතර ඇතැම් විට අවුරුදු 10 කුඩා දැරියේ පටන් 60-70 මහළු වයසේ කාන්තාවන් පවා ගොදුරු විය. මෙය එම යුද්දයේ සුලභම සිදුවීමක්ද කි‍යතොත් එය නොකරනා හමුදා සෙබලෙක් එම පාර්ශ්ව වල සොයාගැනීමට නොහැකි වූ තරම් බව කියයි. ඒ දිනවල එක් සෙනසුරාදාවක උදෑසන අප ‍රටේ ගුවන් විදුලි නාලිකාවක එම යුද්දය පිළිබදව ගෙන එන ලද වැඩසටහනක් අසන්නට ලැබුනි. එහි සංක්‍ෂිප්තය මෙසේය. එම යුද්දයේ එක් පාර්ශවයක කුඩා සොල්දාදුවන් කණ්ඩායමක් ගමකට කඩා පැන එහි කාන්තාවන්ට අතවර කරන්නට වී ඇති අතර ඇතැම් අය එක් කාන්තාවක් පමණක් තෝරා ‍ගෙන එක් භටයෙකුට පසු තවත් භටයෙක් පැමිණ අතවරයට ලක්කර තිබේ. මෙම සිද්ධිය මෙසේ සිදුවෙද්දී එක් භටයෙකු තම කාර්යය කර ගෙන අහවර වූ පසු අනෙකා එම ස්ථානයට පැමිණ එම කාන්තාව දෙස බලා සිට මෙසේ කියා ඇත " මට ඔයාට ඒ දේ කරන්නට බැහැ. මොකද ඔයා මගේ වැඩිමහළු සොහොයුරිය වගේමයි. හැබැයි මට පස්සේ එන කෙනාට මම මුකුත් නොකර ගියැයි කියන්නට එපා. ඔවුන් මට හිනාවේවි". ස්ත්‍රී දූෂනය එතරම්ම එම යුද්දයේ ‍පොදු සාමාන්‍ය දෙයක් වී තිබූ බව පෙනේ. එහෙත් එයින් හැම රටකම හමුදාව මෙසේ කරනා බවත් නොහැගෙන අතර අපේ ලංකාවේ හමුදාවේ ක්‍රියාත්මක වූ විනය හා අපේ රටේ පවතින සංස්කෘතික බැදීම් නිසා මෙවැනි සිදුවීම් ඉතාමත්ම අල්ප විය. 

http://en.wikipedia.org/wiki/Bosnian_War

එහෙත් දෙවන ලෝක යුද්දය පැවති සම‍යේ මානව හිමිකම් ගැන තැකීමක් හෝ අන්තර්ජාතිකව යුද අපරාධ විමසීමේ සංවිධාන ව්‍යුවහක් නොතිබූ නිසා එම යුද්දයට සම්බන්ධ වූ සෑම පාර්ශ්වයකටම අවශ්‍යව තිබුනේ සතුරාට කල හැකි උපරිම හානිය කර තමන්ගේ ජයග්‍රහණය සනිටුහන් කර ගැනීමයි. නැතුව එකල විනය රැකගනිමින්, තමන්ගේ හමුදාව කරනා යුද අපරාධ වලට දඩුවම් දීමට වඩා ඔවුන්ට වැදගත්වූයේ යුද්දයට බියෙන් පැනයන සොල්දාදුවන්ට දඩුවම් කිරීමයි. ඉතින් මානව හිමිකම් තහවුරු කල මෙන්ම, විවිද අන්තර්ජාතික සංවිධාන වලින් ඒ සමබන්ධයෙන් කටයුතු කරනා 90 දශකයේ තත්වය එලෙස නම් ලෝකයේ බහුතරයකගේ වෛරයට පාත්‍රවී සිටි ජර්මන් රටේ මෙවැනි සිදුවීම් එකක් දෙකක් හෝ සිදුනොවුනි නම් එම ආක්‍රමනිකයන් අනිවාර්යයෙන්ම බෝසත් ගුණ ඇති මිනිසුන් විය යුතුය.

දැන් මෙම දීර්ඝ පැහැදිලි අවසන් කරන්නෙමි. ඔබ කියනා අයුරින් කිසිදුවිටක වීරයන් යට යවන්නටත් කාඩ්බෝඩ් වීරයන් උළුප්පා තැබීමටත් මා හට හෝ මෙම ලිපිය කියවූ මධ්‍යස්ථ පාඨකයන්ට අවශ්‍ය නොවේ. අප සිදුකලේ ඉතිහාසයේ සිදූවූ සිදුවීම් ඔබ පිළිකුල් කරනා බටහිර මාධ්‍ය කියනා සැටියෙන්ම නොගෙන ඒවා තවදුරටත් පරීක්‍ෂා කර සමබරව ඉදිරිපත් කිරීමයි. ඔබට අප‍ගේ මතයන්ට අභියෝග කරනවා තබා ඔබ‍ගේ මතය ගැනවත් විශ්වාසයක් නැතිහැඩක් නම් පෙනේ. මන්ද ඔබට ඔතරම් ඔබ ඉදිරිපත්කරන කරුණු නිවැරදි නම් ඒවාට අවශ්‍ය සාක්‍ෂි වන ලිඛිත ලියවිලි හෝ වෙබ් අඩවි පිළිබදව ඉදිරිපත් කරන්නට නොහැකි මන්ද? එසේම ඔබට ඔබම ලෙස පෙනී සිටින්නට බැරි මන්ද? නිර්ණාමිකව, ව්‍යාජ ප්‍රතිරූපයක් මවා නොගෙන කරුණාකර ඔබගේ සත්‍ය ස්වරූපයෙන්ම කරුණු පිළිගත හැකි සාක්‍ෂි සමගම ඉදිරිපත් කරන්න.

පසුවදන :

සත් සමුදුරේ මෙබදු ලිපියක් කවදාවත් පලකරන්නට වේ යැයි සිහිනෙන්වත් නොසිතුවෙමි. එහෙත් දිගින් දිගටම අසත්‍ය ඉතිහාසයක් හා ඉතිහාසයේ සිදුවූ කරුණු විකෘති කර පල කරනා අදහස් වලට සාක්‍ෂි සමග  පිළිතුරු නොදී සිටීමෙන් වන්නේ සත් සමුදුර බලන්නට එන මෙම ඉතිහාස ගත කරුණු නොදන්නා පාඨකයන්ද සත්‍ය ඉතිහාසය ලෙස ඇතැම් විට මෙම අවිශ්වාස සහගත කරුණු පිළිගැනීමයි. මෙම ලිපියද ඕනෑම කෙනෙකුට අදහස් දක්වන්නට විවෘත අතර කරුණාකර පිළිගත හැකි සාක්‍ෂිද සමග තර්කයට එළඹෙන ලෙසද ඉල්ලමි. නැතුව නිර්ණාමිකව තැනින් තැනින් සම්බන්ධතාවයක් නොමැති කරුණු මෙන්ම අවලාද නැගීමෙන් අප කාගේවත් දැනුම වැඩිවීමට එය රුකුලක් නොවන බවද පවසනු කැමැත්තෙමි. එසේම මේ ලිපියෙන් පසු මා බටහිරගැති අයෙකු හෝ ඒවායෙන් ආධාර ලබන්නෙකු ලෙස ‍නොසලකන මෙන්ද ඉල්ලා සිටින අතර මෙම ලිපියෙන්ද බලාපොරොත්තුවූයේ සත් සමුදර මුල සිටම ගෙන ගිය මධ්‍යස්ථ මතය තව දුරටත් ඉදිරිපත් කිරීමයි. එසේම මෙයින් කිසිදු රටක්, රාජ්‍ය නායකයෙක්, සංවිධාන හෝ ආයතනයක් පහත් කිරීමකට හෝ අපහසුතාවයකට ලක්කිරීමේ අදහසක් නොවූ බවද කරුණාවෙන් සලකන්න. එසේම යමෙකුට මෙයින් සිත් රිදවීමක් සිදුවුනි නම් එය පිළිබදවද කණගාටුව ප්‍රකාශ කර සිටිම...