හොද මිනිසුන්ගේ හොද වැඩ සදහා ප්‍රසිද්ධිය හා ජාතිවාදය අවශ්‍ය නොවේ. මේ එයට උදාහරණයකි...

ඔබට මතකද දැනට මාස දෙකකට පමණ පෙර මා මෙහි පළ කළා ගලහ ප්‍රදේශයේ කුඩා දරුවන් පිරිසකට පෙර පාසලක් සාදා ගැනීමට උපකාර කරන ලෙස. ඔබට මතක නැතිනම් මෙන්න ඒ ලිපිය.

සිංහල බෞද්ධයිනි, ක‍තොලිකයිනි, මුස්ලිම් හා හින්දු භක්තිකයිනි මෙන්න සහෝදරත්වය ප්‍රායෝගිකව ‍පෙන්වීමට අවස්ථාවක්...

කියන්නට සතුටුයි අගෝස්තු 10 වනදා එම පෙර පාසල තනා අනාගතය භාර ගැනීමට සිටින එම අහිංසක දරුවන්ට භාර දීමට පූජ්‍ය ගඟසිරිපුර ධම්මාලෝක හිමි ප්‍රමුඛ හෙළ විජය තරුණ සංවිධානයට හැකිවුනා. තවත් කාරණයක් තමයි එය සදා නිම කිරීමට ඇස්‍තමේන්තු කළ මුදලටත් වඩා සෑහෙන්න අඩු මුදලකට එම කාර්යය කරගැනීමට හැකිවීම. මෙන්න මේ සබැදියේ තිබෙනවා එම පින්වත් පිරිස කුඩා උත්සවයක් පවත්වා පෙර පාසල විවෘත කළ අවස්ථාවේ ගත් සේයාරු හා විස්තර.

පුංචි අපට අලුත් පෙරපාසලක්..

තවත් කාරණයක් තමයි සත් සමුදුරේ එදා මේ ගැන පළ කළ ලිපිය දැකලා දෙස්විදෙස් පින්වතුන් රැසක් මූල්‍යමය ආධාර කර තිබෙනවා එම සත් කාර්යය ඉටු කර ගැනීමට. ඒ එක්කම ඔවුන් හැම දෙනෙක්ම, තමන් එයට දායක වූ බවට කිසිදු ප්‍රසිද්ධියක් හෝ සදහනක් නොකරන ලෙස ඉල්ලා සිටි බවද අවධාරණයෙන් මතක් කළ යුතුයි. ඒ නිසා කණගාටුවෙන් වූවත් එවන් මහඟු වැඩ සටහනකට දායක වූ හා ඉදිරියේදිත් දායක වීමට බලාපොරොත්තුවන එවන් සුගන්ධවත් මිනිසුන් ගැන නම් වශයෙන් කතා කිරීමට නොහැකී වූවත් පුහු ජාතිවාදය, ආගම්වාදය හෝ වෙනත් ඕනෑම අන්තවාදයක් පසෙක ලා තමන්ගේ යුතුකම රට වෙනුවෙන්, අනාගතය වෙනුවෙන් ඉෂ්ඨ කිරීමට සම්බන්ධ වූ සියල්ලන්ටම මේ අවස්ථාවේ ස්තූතී පූර්වක මල් පොකුරක් පිළිගන්වමි.