Sex පිළිබදව ‍ගූගල් සෙවීමෙන් ලංකාව එකට..කාන්තාවන්ට සිදුවන අතරව වලට ප්‍රධාන එක් හේතුවක් නම් ඔවුන්ගේ ඇදුම් පැලදුම්

2012 අවුරුද්දත් ඉතිහාසයට එකතුවෙන්න ඔන්න මෙන්න තබා තිබියදී මේ ලිපිය වෙලාවේ හිතුන දෙයක් තමයි මේ අවුරුද්දේ වෙන මොනවා නැතත් බ්ලොග් එකට මෙයට වඩා ලිපි ලියන්න සිතා සිටියත් ඒ ඉලක්කට යන්න බැරි වුනා නේද? කියන එකත්.  කොහොමවුනත් කරන්න බැරි වුන දේවල් වලට වඩා කරන්න පුළුවන් වුන දේ ගැන සතුටු වෙන එක හොදයි කියල හිතලා මේ දවස් වල ටිකක් සංවාදාත්මක වගේම විවාදාත්මක මාතෘතාවක් ගැන යමක් ලියන්න සිතුවා. මේ සතියේ දැන ගත්ත දෙයක් තමයි ලෝකයේ රටවල් අතරින් Google හරහා sex කියලා සෙවීම් කිරීම අතරින් ලංකාව පළමු ස්ථානයට පත්වී තිබීම. ඒ ලැයිස්තුවේ ඊට පහලින් තිබෙන රටවල් ගැන කෙසේ වෙතත් ලංකාවේ නම් මෙම තත්ත්වය ඇතිවීම එතරම් පුදුම වෙන්න දෙයක් නැහැ. මොකද එහෙම කියන්නේ කියලා කිව්වොත් සාමාන්‍යයෙන් අපි කුතුහලයෙන් සොයා බලන්නේ ‍නොදන්නා හරි දුර්ලභ දේවල් ගැන. ඉතින් දැන් ලංකාවේ ලිංගිකත්වයට තිබෙන වැටකඩොළු සහ එය ඉතා විශාල වැරැද්දක් ලෙස පවා නිල ‍නොවන වශයෙන් සලකන කාලයේ ගූගල් හරහා හරි කාටත් නොදැනෙන්න බලන එක අරුමයක් නොවෙයි. 

අනෙක තමයි හැමකාලෙම වගේ ඇහෙන කාන්තා අතවර වල එක් හේතුවක් වෙලා තියෙන ඇදුම් පැලදුම් ප්‍රශ්නේ. මේකේ එක් අතකින් ඇත්තක් හා සාවද්‍ය කාරණයකුත් තියෙනවා. සාවද්‍ය කාරණය කියලා කියන්නේ දැන් ඇමරිකාව ප්‍රමුඛ බටහිර ර‍ටවල කාන්තාවන්ගේ ඇදුම් අපේ රටේ අදින ඒවාට වඩා බොහොම වෙනස්නේ. ඒත් ඉතින් ඒ රටවලට මේ වගේ ඇදුම් නිසා අතවර වෙනවාය කියලා ඇසෙනවා අඩුයිනේ. එයට බොහෝවිට හේතුව වෙන්න ඇත්තේ ඒ රටවල අනිසි විදියට ලිංගිකත්වයට තහංචි නොදමා තිබීම වගේම කුඩා කාලයේ සිටම එහේ පිරිමි ළමයින් පිහිනුම් තටාක, මුහුදු වෙරළ ආදියේදී ඕනෑතරම් කාන්තාවන් බිකිනියෙන් සැරසිලි සිටින අවස්ථා දැකලා තියෙන නිසා ඔවුන්ට අපේ රටේදී මෙලෙස අඩුවෙන් ඇදුම් හැද සිටීම හැදින්වෙන විදියට මේ අඩනිරුවත සාමාන්‍ය දෙයක් නිසා කාන්තාවන්ගේ ඇදුම් වලින් කොහෝ හරි නිරාවරණය වෙලා තියෙන තැනක් දැක්කොත් හරි අගපසඟ ටිකක් කැපී පෙනෙන විදියට ඇන්දොත් හරි හැගීම් ඇවිස්සෙන්නේ නැතුව ඇති. ඒත් අපේ රටේ‍ පිරිමි ළමයි අතලොස්සකට හැරෙන්න මේවගේ අවස්ථාවක් උදානොවෙන නිසා උන් ලොකු මහත්වෙලා කසදත් බැන්දට පස්සෙත් කොහේ හරි ගෑ‍නියෙක්ගේ ඇදුමේ මොකක් හරි අවුලක් තිබුනොත් මේ කියන විදයට පිස්සු නටන එක අහන්නත් දෙයක්ද? 

මම කියන්නේ නැහැ දැන් අපේ රටේ ග‍මේ ගොඩේ කොල්ලොන්ටත් මේ වගේ බිකිනි ඇදගෙන ඉන්න ගෑනු පොඩිකාලේ ඉදලම පෙන්නලා අඩනිරුවත සාමාන්‍ය දෙයක් කරල ඔවුන්ගේ හැගීම් සමතුලිත කරන්න කියන එක. මෙතන වෙලා තියෙන්නේ ඕනවට ව‍ඩා මිනිසුන් සුචරිතවාදීන් කරන්න ගිහිල්ලා එයින් ඇතිවෙලා තියෙන ප්‍රතිඵලය කාන්තා අතවර හා බාලාපරාධ වැඩිවීමයි. අනෙක තමයි සම්පූර්ණයෙන්ම ඇඟ වසාගෙන සිටියයා කියා අරාබියේ ලිංගක අපරාධ සිදුනොවන්නේද? ඔව් මුස්ලිම් කාන්තාවන් ඇඟවසා ගෙන සිටිනවා තමයි.ඒත් එයින් තමන් සාමාන්‍යයෙන් ඇද සිටින වස්ත්‍ර ඔවුන්ගේ ආගමේ නියමය පරිදි වසාගෙන සිටියයා කියා මුස්ලිම් පිරිමින් සෑමවිටකම චරිතවත් වී තිබෙනවාද? අරාබිකරයේ ඔවුන්ගේ මුස්ලිම් කතුන් ලිංගික හිංසනයට ලක්වෙන්නේ අඩුවෙන්දැයි නම් නොදනිමි. එහෙත් එහිදී අපගේ ර‍ටවලින් යන කාන්තාවන් බොහෝවිට අසන්නට ලැබෙන පරිදි ලිංගික හිංසනයට ලක්වන්නේ ඔවුන් ඔළුවේ සිටි පහළට කළු රෙදි නොපොරවා සිටින හෙයින්ද?

තවත් කාරණයක් තමයි දකුණු පළාත් සභාවේ මන්ත්‍රීතුමෙක් කියපු ගණිකා වෘත්තිය නීතිගත කරන්න කියලා කියපු එකට ඇතැම් අය පක්‍ෂව වගේම එතුමා කියපු කාරණය මතුපිටින් බලලා නිර්දය ලෙස තර්කානුකූල නොවන ලෙස එතුමා හෙලා දැකපු ආකාරය ගැනත් යමක් කියන්න ඕන. මෙහෙමයි ගණිකා වෘත්තිය දැන් අපේ ‍රටේ තිබෙන ආකල්ප හා සංස්කෘතිකමය සීමා මායිම් ඔස්සේ නීති ගත කරන එක හිතන තරම් ලේසි නැහැ වගේම එයින් සමහර අහිතකර ප්‍රතඵලත් ගෙන දෙන්න පුළුවන්. ඒත් මෙම වෘත්තියට කොතරම් බාදක දැම්මත් මුලිනුපුටා දමන්නටත් පුළුවන්ද? ඒ නිසා අකමැත්ත හෝ කැමැත්ත මොකක් වුවත් සෞඛයමය වශයෙන් මෙම වෘත්තියේ යෙදෙන එය නිසා ඇතිවිය හැකි අහිතකර විපාක ගැනත් සලකාබලා යම් ක්‍රියාමාර්ගයක් ගැනීම වැදගත් බවත් කියන්නට ඕන යයි සිතමි.

මෙම ලිපිය බොහොම කෙටියෙන් ලියා තැබුවත් යම් සංවාදයක් ඇතවුවහොත් තවත් කරුණු එහදී එක් කිරීමට  බලාපොරොත්තුවෙමි....